MARANG SANG GURU
Apa ana wewarah kang bisa
Njlentrehake werdine
subasita
Iki ana bocah kepengin melu
obah
Nanging mbutuhake
patuladhan
Mungguh kepriye carane
mapanake dhiri
Kapan kudu keras budi
Kapan kudu nyelehake ati
Srengenge mumbul ana ing
aksara timur
Bakal ginayuh bareng
undhake umur
Endi wewarah nyata kang
nguwatake
Cipta rasa lan karsa, dak
gadhang-gadhang
Bisa mekarke esem manis
kang tulus
Senajan lagi nandhang
prihatin
Kardono
Jaya Baya eds 27, 2 Maret
1997
ORA SUMBUT
Takgadhang dadi bentenging
bangsa sing gamben
Taklenthing dadi nasional
sing kritis
Lan takdama-dama dadi
suhing nuswantara sing sumbaga
Tibake bedhu
Menang pemilu malah
ngrempelu
Nunggang jaran tanpa
pedhang
Swara garang kalah perang
Sing takgadhang dadi
bentenging kesatuan
Trima nonop kloap-klaop
melu federalis
Ora sumbut sing mbopong lan
sing mbayangkare
Mangka korbane ora rampung
disangeni puji sesanti
Sumbare wae ngegiro
nggegirisi
Obral getih sing ora
nggetihi
Banjur apa piwalese marang
batih
Sing kadhung dienshih lan
diinjih-injih
Sing melu koplak alok katut
tombok
Gebel pulut ora katut
nguntut nangkane
Apa pikolehe sing
nggegadhang lan katut dadi bathang
Mangka wis kasep melu
ngrindhit jas dhasi abang tetep
Panjebar Semangat No. 2-8
Januari 2000
SAMODRA NUSANTARA
Ginurit wantah krenteg ing
nala andhudhah
Ndhudhah samodra kang
gumelar endah
Samodra warisan canggah
embah
Apa wis dakolah
Durung mbah
Durung tutug anggonku dredah
Isih rebut uyah
Ora
peduli diarep-arep wayah
Dumeling welinge leluhur
Samodraku kaya duwekmu
Dakweling biyen reksanen
Olahen!!!
Delengen bandha jeroning
tirta
Bandha mumpuk nggo mulyane
bangsa
Reksanen saka pangrogote
tangga durjana
Olahen dimen anak putu
gumuyu
Tinggalen anggonmu tansah
rebut untu
Samar Dijad
Panjebar Semangat No. 2, 12
Januari 20008
ING SAK NDHUWURING SAJADAH
Ing sak ndhuwuring sajadah
tak gelar donga
Dak turut tasbih ngetung
donga
Ora ana panggonan kanggo
kebecikanku
Ing ndhuwur sajadah banjir
mili luhku
Kebak rasa mongkog lan
sombong
Pantes yen kok tutup
pintu-Mu
Amerga abot sanggan
timbanganku
Nanging menawa tega, aku
mesti ora bakal kecongkah
Ya mung ampunan lan
ridha-Mu ya, Allah
Ing sak ndhuwuring sajadah
gemeter nyebut asma-Mu
Wis nganti maleh awakku
Nanging endi maneh kudu
mandhep
Kajaba nothog pintu
tresna-Mu
Sugeng Isdiyanto
Panjebar Semangat No. 15,
12 April 2008
JIARAH
Keruting praupan kang kebak
tresna asih
Wis mungkur binoyong mangsa
Kang bisa sinawang
blegering maesan sepasang
Tangan asihmu
Kaya lagi wingi ngusap
luhku
Jerit panalangsa
Marga nalika aku lumaku
katintangan
Donga pamujimu tumaruntun
Pindha tumetesing udan
mangsa ketiga
Dadi patohing lumaku
Keruting pasuryan kang
kebak tresna asih
Wis mungkur ginawa sepi
Soroting paningal kang
ngendhem panjurung
Dadi pepadhang tumapake
laku
Swara kalem kang ngundhut
pambombong
Dadi cagaking sesanggeman
Pepeling langgeng
pangayoming jiwa
Nanging kabeh-kabeh wis
padha mungkur
Kari wewayangan kang
gumawang
Ginaris watesing pepesthen
Sumawure mawar melathi
Wujuding bekti rasa kapang
(ing pusarane Bapak-Ibu)
J.F.X Hoery
Panjebar Semangat No. 16,
19 April 2008
KELANGAN
Mbok, neng endi aku saiki yen arep playon?
Latar omah wis ora ana
Lapangan wis dadi mall
Mbok, neng endi aku saiki arep penekan?
Wit-wit wis ditegori
Dadi omah cekli lan pabrik
Mbok, neng endi aku saiki arep ciblon?
Kali-kali banyune wis butheg
Kali-kali mili umpluk
Mbok, aku kepengin dolanan motor-motoran
Saka kulit jeruk
Apa isih ana, mbok?
Mbok, aku kepengin
Padhang mbulan dolanan neng latar
Padhange kaya rina
Nanging aku wedi, mbok
Mbulane wis ora padhang
Mbulane ana butane
Butane doyan bandha
Bandhane negara
Siti Purwati, S.Pd.
Panjebar Semangat No. 12 – 24 Maret 2012
Halaman 40
WAYANG (NG) LALI
DHALANG
Aku wayang, kowe wayang, kabeh wayang
Aku, kowe, lan liyane
Wayang sing duwe pikir
Pikir sing cetha adoh yen disandhing pikire Dhalang
Aku, kowe, kabeh wayang
Wayang sing (kudune) manut lakone Dhalang
Aku, lan (mbok menawa) kowe, wayang sing wis metu saka
kothak
Aku, kowe, wayang sing (ng) lali blencong, geber, lan
Dhalang
(Ng) lali sapa Dhalange awake dhewe
(Ng) lali kepiye kudune ngrumati Dhalang
(Ng) lali yen Dhalang wis kerep murka
Ah, apa pancen aku lan (mbok menawa) kowe ki wayang
Sing (ng) lali Dhalang?
Ade Rizkia Mandiri
Blakasuta Edisi 3
Halaman 16
MAWAR
Esuk nyebar wangi ngambar-ambar
Mawar sing wingi mekar saiki ngebaki latar
Bun-bun ndhuwur godhong sumunar pindha inten mencorong
Ri-ri landhep ora tedhas ketiban anyep
Godhong-godhong ijo pulih seger royo-royo
Apa tembungku iki nyangking wangi
Ngilangi bacin sementug nyampegi ati
Apa budi landhep, karepku mantep dadi cuwa ing ati ora
teteg?
Apa atiku inten mencorong
Mbabar gebyaring sukma tanpa blencong
Apa uripku tetep seger awet mudha dadi sumbar?
Yen mangkono aran begja
Tandha yen urip iki binerkahan Gusti
Nilam
Taman Gurit Hal. 20
SEKAR WUS SUMAWUR
Sekar wus sumawur
Sauruting lurung-lurung
Lan donga kaduwung
Ngumandang ing awang-awang
Rumesep ing gegodhongan
Ngrenggani wengi kang sampurna
Angin tumiyup, jenjem
Lan kumesar pucuk-pucuk cemara
Sekar wus sumawur
Ing dedalanan rumpil
Mblabar ing antaraning krikil
Sesandhungan
Ngiring sukma oncat raga
Sekar wus sumawur
Ing pucuking raga
Raga bakal sirna
Sukma nuju kaendahan agung
Mendhung gumantung ing tawang
Sumilak
Tan bisa munthes pengarep-arep
Ngluru pepadhang jati
Sekar wus sumawur
Ing akasa lan mega-mega
Nalika suku tumapak
Ing korining swarga
Handayani MW
Taman Gurit Hal. 30
KALA BENDU
Ngoceki wewadining jaman
Kang wus ilang kaprawira
Kang wus musna watak satriya
Ngrungkebi bangsa labuh negara
Para nayaka tindak culika
Tetungguling praja abudi candhala
Nguja hawa gawe cintraka
Kawula pepriman nandhang sengsara
Kapidak godhaning panguwasa
Kapan jaman lumintir?
Ngombe banyu tan rasa getir?
Nedha boga tan rasa pasir?
Urip datan pating saluwir?
Kawula pepriman anggadhang
Tekaning jaman kang ora gothang
Raharjaning urip kang dikekudang
Tumetesing embun saka ing tawang
Ing lemah bengkah nela
Nyiram cintraka ngaru-ara
Mberat tindak duraka
Kang nggonjak donyaning kawula
Harya Widad HS
Taman Gurit Hal. 31
RONDHA
Rondha
Nabuh kenthongan ing parondhan
Nrethek nugel dalan prapatan
Ngelingake bebrayan mring kawaspadan
Iki rak forum dhemokrasi
Kang gumelar ing tengah wengi
Bisa ngrasani
Tangga teparo pak rt pak rk pak lurah sagarwane
Bisa dadi konsepsi
Ngoreksi lan nggemateni koperasi
Ngedum rejeki kang murakabi
Mula
Mripatku aja nganttuk tekan esuk
Kuping nadyan kebunan tetep kaku lan njepiping
Cangkem kena ngrancang kanthi pakem
Iki amalan
Dudu omelan
Weteng aja klurup sandhing ngebuk
Iki dicepaki wedang kopi
Dening mbak puji
Endi paiman
Wis ben aja digugah lagi kelonan
Amarga kabeh prelu kasadharan
Jimpitane kok mung nyakmit
Ya ben jenenge bae jimpitan
Dudu jumputan cangkiran apa literan
Iki mung kanggo nyawur mripatmu
Ngithikithik arasarasanmu ayubayubenmu
Ngobahake boyokmu
Wose
Rondha
Mugamuga pangibadahmu jumbuh karo pakaryanmu
Filasafate
Cegah dhahar lawan guling
Selingane
Milangmiling kudu awas kudu eling
Sudi Yatmana
Gurit-Guritane Halaman 29
LET US GO (READ BY
HEART: MOVE TO BORNEO)
Aja suksukan
ana ing Tanah Jawa
Empetempetan
muntel muwel ing Kutha Jakarta
Akeh godhane
resikone bebayane
Aja takon
maneh dosane
Sangsaya suwwe sarwatuna
Kasatan wiraga wirama lan wirasa
Jakarta
ngemut legining gula
Nggajah elar
kumawasa
Bareng kebak
sundukane
Bayar bubar
nglenthar sakabehkabehane
Ayo pindhah menyang Mborneyo
Yen perlu sanak bojo
Waton duwe katrampilan kabisan kawasisan onjo
Aja padha
golek gawean
Ayo padha
gawe gawean
Mbukak alas
nenandur lan dedagangan
Wis ora jaman
Royokan rayahan obongobongan
Kabeh kang wekel ing pambudi
Iku jeneng wis wiwit dadi
Alonalon rejeki padha nututi
Nora wurung katentreman maripit marepegi
Ayo awak
dhewe anak putu
Putune putumu
putuku (Eugenia Chantikaning Wastu
Angher
Alvareza Irene Cittaning Laksmi Odniel
Kirsten
Mahadika Zulva Alya Luthfia Neza; kuwi
gambaraning jeneng bocah saiki, lan
sapa maneh
sing padha antri, pabrik putu terus
berproduksi)
didunungake ngreti misi dilungguhake
duwe visi
ngulir ngulur ngular budi
anggambuh angakbarake pakarti
alantaran bebarengan sarta ing sajrone
rohing
alam samesta iki
kabeh dadi mekar nyata bener becik tur
migunani
Ayo nggarap njunjung Mborneyo
Gawe gawean kang onjo
Go global go go go
Panggurit
Where
do you go
LET US GO TO BORNEO
[MARILAH KITA PINDAH KE KALIMANTAN]
AYO PINDHAH MENYANG MBORNEYO
Sudi Yatmana
Gurit-Guritane Halaman 53-54
LELIMBANGAN
Swarga iku apa
Naraka iku apa
Agamamu agamaku mung minangka rerenggan lelamis semu
Yen kabeh iki ora bisa jumbuh karo karsane kang winahyu
Sarta pangolah pangrekadayane manungsa kang aran panemu
Kayakaya wis ora bisa rumangsa
Anggone padha naliti priksa samubarang babagan
Adhedhasar landheping cipta
Banjur aber prentul urip tuwuhing rasa
Kaendhih cepak dumadaking karsa
Kauber target kagelak statistik
Kasurung programprogram pantaraning mangsa
Tumuli mantheng kenceng pindha anggepe mangsa
Nanging luput saka ing ciptane
Malah kadlarung kadulu wektune
Diayemayem dikendelkendel ditetegtetegake
Wusana lepya virus-virus stres wus warata sajroning jiwangga
Swarga iku apa
Naraka iku apa
Agamamu agamaku minangka rerasan bebandaning badan
Yen tumanggaping marang alam marang sakabehing kaanan
Oyakoyakan rebut dhucung ora imbang
Ngimbangi pangejawantahe anane kang dianakake lan kang
nganakake
Swarga iku sarwa lega ing swargawarga
Ora mbedakake bangsa nagara lan agama
Naraka iku nerakneraka
Atinggal kang sarwa imbang
Mungguhing dumadi pangesthi wewadi lan misteri
Swarga iku apa
Naraka iku apa
Agamamu agamaku dadi pratandhaning jaman
Kabehkabeh hamung ngenut bawaning kahanan
Bebener dedalaning urip jejumbuhing kawilujengan
Sudi Yatmana
Gurit-Guritane Halaman 192-193
LHA YA WONG DURUNG
NGRETI
Lha ya wong durung ngreti
Kaya watu dijaluki
Teguh timbul jaya sekti
Wit si kayu lan si watu
Dianggep duwe daya pangribawa
Bisa marakake seger waluya
Bisa ndadekake kuwat santosa
Jaman liya
Mangkono kuwi diarani gugon tuhon
Dhinamisme kang salah waton
Iya mung kanggo geguyon
Gandrik
Bareng jaman teknologi
Mangkono kuwi diselidhiki
Jebul pancen ana
Kaya watu kang mangkana
Jer duwe jat sarwa-sarwa
Nanging ya ora njur apa bae
Kabeh kayu kabeh watu dipadhakake
Lha ya wong durung ngreti
Wong mati dijaluki rejeki
Bojo ayu pendhok kuning lan promosi
Jer wong mati iku sampurna jati
Ora kurang kasenengan kabutuhan sandhang bukti
Jaman luwih modheren
Mangkono kuwi diarani donga kesasar
Animisme kang salah kamar
Dianggep cupet ing nalar
Nanging
Apa lakuning nalar mengkene iki singlar
Kayu watu iku rak ana kang nganakake
Mesthine iya banjur ana anane kang dianakake
Lha ya pancen karsane
Ora ana kang mlese
Ora ana kabeh mokale
Wong mati iku nyawane rak bali
Marang asal kamulane kamulyane
Asaling asal kang ngasali kabehing asal
Mulaning mula kang mulani kabehing mula
Mulyaning mulya kang mulyani sakabehing kamulyan
Kang sarwa ora mokal kang sarwa ora ewuh aya
Apa jaman saiki wis dadi
Wis luwih trep karo kang wingi-wingi
Apa anggone padha ngibadah wis prenah
Dunung karo dununging panembah
Apa awake dhewe iki
Dudu dhinamisme animisme modheren
Ing dina liya
Ing alam kana
Sapa ngreti
Lha yo wong durung ngreti
Lha yo wong ora ngreti
Lha ya wong ora bakal ngreti
Sudi Yatmana
Geguritan Alam Sawegung
Halaman 6-7
NGGANDHUL GARIS
Aku mangan basa jawa
Lawuh inddonesiya lan inggris
Kadhang kala landa sansekerta arab lan cina
Lalapane basa dhaerah liyane
Sambele basabasa manca
Ajang manekawarna
Bathok piring mangkok godhong jati
Terkadhang pincuk godhong gedhang
Telep-telep muluk
Ngombene banyu kendhi
Nanging iya ora nampik soklat susu teh utawa kopi
Ora mung mangan ngombe
Dalasan makarya srawung aso sembahyang turu apadene
Daklakoni sarana sasmita adi
Ngiras karo ngenteni tumuruning wahyu sejati
Iki tataning lair dene tataning batin
Tumuju marang pangolahing
Pribadi
Kulawarga
Bangsa sesama
Tundhone tang wurunga Panjenengane
Aku mangan basa
Ajang manekawarna
Bareng wong sadonya
Ngombeku banyu kendhi banyu wahyu banyu misteri
Jer kabeh rejeki pakaryan lan apa bae kang daklakoni
Dakalami
Nggandhul garis
Jedhul joge ngener pener jumbuh jatine
Sudi Yatmana
Geguritan Alam Sawegung
Halaman 107-108
EDAN
Iki negara apa
Kok kaya kraton durjana
Begal kecu maling rampog
Padha ngleter
Jogedan tengah rattan
Sapa sira sapa ingsun
Dumeh kinasih ing sinuwun
Harata ya...
Kok olehe padha tega
Emaneman
Tinggalane pahlawan
Kok amung kanggo dlajigan
Ah... yap antes
Karang biyen durung keduman
Pancen KRANJINGAN!!!
Rini Tri Puspohardini
Kidung saka Bandungan
Halaman 47
SIMFONI
GUNUNG SEMERU
Mumpung angin wengi durung rampung ngelus kayu-kayu
Guritan alam isih kaukir ing lembaran-lembaran watu
Nembanga para ahli katentreman. Nglipur mutiara
Bun lan wengi mawar sing ngambar ing antariksa
Semburat abang ing bang wetan kae
Lan kumricik banyu kali ing saselane watu-watu
Ora liya mukjizat tumrap tatu-tatu sejarah
Tumrap tetuwuhan lan makuthane tanah mlerah
Iku pangurbanan marang eluh sing tumetes
Nggetuni sepira jerune tapak-tapak sing nabet ing bumi
Sing nuwuhake hawa panas tumrap bayi-bayi
Pirengna timbalan Pertiwi
Sapa sing kajibah ngentas gosonge mlathi
Sapa sing wajib nglipur tangise nurani
Nalika lakune temanten wis tanpa pangiring
Uga klasa sing biyen ginelar ing tengah latar
Mung kari dadi seksi atas dongeng sing nate tansah binabar
Lumut-lumut wis alum saiki
Banyu kali angganda bacin
Alas liwung bosah-basih katrajang kuku angkara
Gunung-gunung bitha-bithu
Jember taman kutha lan lurung pakampungan
(Sauntara prostitusi dadi lambang modhernisasi
Rerentengan lawan sogok, korupsi, lan manipulasi!)
Iki simfoni gunung Semeru
Tangise bocah bayi kasatan banyu susu
Biyung mlayu ninggal glanggang karang padesan
Ngoyak gebyar konang-konang metropolitan
Bilahi! Bilahi! Tanah warisan Ibu pertiwi
Entek jinarah petani menganggo dhasi
Garu-wluku kontal ketriwal
Gubug ing kebon jagung gosong binakar
Kembang desa kedhampar ing lokalisasi
Esem palsu, dedagangan gincu lan pupu
Ati nangis nanging kudu ngguyu
Abot-abote wis keblusuk ing kedhung watu
Biyung, endi anakmu lanang sing biyen sumpah
Mundhi manah ngukup lendut lan banyu sawah?
Sepira gedhene tekad, nlusur garis sangisore mega
Sesuluh jantra sinaput gambar mlathi ing ndhuwur tilamsari
Cahyane alum tinojeh landhepe mingis glathi
Marang edelweys lan cemara pagunungan
Marang lamuran lan ganda wangi blethok pasawahan
Bocah-bocah lugu masrahake guyu lan tangise
Ing kene bocah-bocah alam pepayingan
Golek kalangan jembar kanggo dolanan lan jejogedan
Kanggo gobak sodor, benthik, jithungan, lan jamuran
(Awit dheweke ora tepung video-game lan karaoke
Ora kenal bowling, bilyard, lan golf
Ora ngerti arak, brendhi, lan wiski)
O, alam sing sangsaya tuwa
Pungkasane ala-becik amung sumangga!
Turiyo Ragilputra
Bledheg Segara Kidul
Halaman 49-50
SARONCE
KEMBANG TELASIH (IN MEMORIAN ANJRAH LELANA BRATA)
Wis tekan titiwancine sliramu nyelehake sesanggan
Urip ing dina-dina kebak lelana
Greget ati ngranggeh asmarane widadari
Gegandheng asta ngubengi taman ciptane pujangga
Guritan lon-lonan nglukis cahyane purnamasidhi
Mitra, ora prelu sliramu tumoleh memburi
Wis ora ana pawadan kanggo mingkuh saka maknane kidung
Sing biyen linaras dening kumricike banyu kali
Lan kembang-kembang jati ing puthuk gegayuhan
Tampanana jawat asta iku, jawat asta iku
Binareng gendhing pangrungrume jagad biru
Kathi ati tinarbuka marang sakehing pangalembana
Panyakrabawa apadene saklimah tembung cecamah
Jer kabeh bakal ngliwati tlundhakan kaca
Sadurunge bisa maca lungide weca tengara
Saka gegana sliramu bakal uninga
Kekembangan sing ko-tandur trubus ngebaki jagad
Gandane tumuli nggenteni esemmu
Sing dumadakan manjilma grimis
Anjrah saambane laladan taman wangi
Banjur macipta kudhup jingga makutha-seta
Sadawane dalan pinaes slendhang-slendhang sutra
Kawuryan riris rarasing kalbu
Sugeng tindak, mitraku. Sugeng tindak
Wus mungkur sunaring bakaskara
Kairing tetes titising waspa
Turiyo Ragilputra
Bledheg Segara Kidul
Halaman 96-97
WAYAH PENSIYUN
Gusti
Aku wis wayahe pensiyun
Kaya dene wong-wong kae
Aku uga duwe was sumelang
Post power sindrome
Awakku wis katon lemu
Dakobrala ora bakal payu
Mangka mung kuwi kang dakduweni
Kejaba pengalaman liya
Sing kangelan olehku crita
Gusti
Aku wis wayahe pensiyun
Pegawean apa kang bisa daktindakake?
: melu dhemo ditutupe lokalisasi
Ngadegake kursus
cara saresmi
Utawa dheleg-dheleg
ngenteni mati?
Gusti
Aku wis wayahe pensiyun
Pensiyun kang kinurmat
Kinurmat ing donyaku
Mesthi dudu ukuran sabenere
Apa ana kang luwih kajen ing donyane lonthe
Kejaba ngesuhi wedokan sing isih sore?
Gusti,
Aku wis wayahe pensiyun
Aku mung kepengin nglintirake apa kang dak ngerteni
Nglairake apa sing dakpengini
Apike kantor-kantor pemerentah
Dicepaki wadon ayu, pinter pijet lan karaoke
Supaya para pejabat sing gedhe nggagase
Ora ngrayah sekretarise
Sawise kesel dhiskusi
Banjur ana sing mijeti
Nalika tenggang-tenggong ora bisa omong
Ana papan kanggo ngerong
Gusti, pepenginanku banget prasaja
Ora ngayawara
Nyepakake papan sing banget dibutuhake
Awit ya wong-wong ing kantor mau
Sing sregep nguleng-nguleng aku
Tinimbang padha slinthutan nyolong wektu
Becik dijor apa karepe
Sakesele,
Nganti kebak sundukane
Gusti
Aku wis wayahe pensiyun
Lilanana ngentekake sisa urip
Ing dalan kanisthan
Dalan kang saben dina dakliwati
Dalan kang mantep dakniyati
(dadi germa kang langganane para panggawa)
Rini Tri Puspo Hardini
Sundel Bolong Njero Senthong
2012: 5
SUNDEL BOLONG
NJERO SENTHONG
Kepriye olehku wani mlebu
Yen njero senthong
Wis ketunggon sundel bolong
Rasane miris najan ta sadrema nyapu
Utawa mbukaki jendhela
Gendruwo, wewe, lan peri
Jejogedan ing kasur, bantal,
Guling, rak, meja, lan kursi
Bacine nduleg irung ngeneg-enegi
Tumempel ing papan-papan paling nylempit
Kalebu ing sak kathok kolormu
Ngoyod, thukul dadi wadun lan koreng
Saemper buta nggegirisi
Ngisis siyung gudras getih
Sawise marem ngrikiti dagingmu
Kepriye olehku wani turu
Yen rasane para lelembut
Ngancap pati saka ngisor, ndhuwur
Ngarep lan mburi
Rebut dhucung dhisik-dhisikan
Golek lenaku
Rini Tri Puspo Hardini
Sundel Bolong Njero Senthong
2012: 51
YEN ANA DEWA
NGANGLANG JAGAD
Tulung ampirana
Dakturun tetulak isine
Kareben kecukupan sandhang pangan
Tanpa kangelan
Abot-abote laku
Melek bengi, sabar, sareh
Narima pandum
Sapa kuwawa?
Sadurunge para dewa nganglang jagad
Nyebar jimat
Tulung ampirna
Aku dudu manungsa pethingan
Ora pantes njaluk pitung turunan
Aku mung butuh samadya
Cukup kanggo kulawarga
Rini Tri Puspo Hardini
Sundel Bolong Njero Senthong
2006/2012: 75
Tidak ada komentar:
Posting Komentar